ភ្នំពេញ៖ យោងតាមអនុសាសន៍ដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ព្រមទាំងទទួលបានការអនុញ្ញាតប្រគល់ភារកិច្ចពីគណៈកម្មការចំពោះកិច្ចចាក់វ៉ាក់សាំងកូវីដ-១៩ រដ្ឋបាលរាជធានីភ្នំពេញ និងចាប់ផ្តើមនូវយុទ្ធនាការចាក់វ៉ាក់សាំងដូសទី៣ និងដូសជំរុញ ជូនដល់បុគ្គលិក-កម្មករ ដែលកំពុងបម្រើការងារដឹកជញ្ជូនទំនិញ ម្ហូបអាហារ និងអ្នកប្រកបមុខរបរសេដ្ឋកិច្ចក្រៅប្រព័ន្ធទាំងអស់ ដែលសំដៅបង្កើតឱ្យមាន "ភាពស៊ាំសហគមន៍រឹងម៉ាំពិតប្រាកដមួយ" ដែលយុទ្ធនាការនេះ នឹងចាប់ផ្តើមពីថ្ងៃទី១៨ ខែកញ្ញា​​​ ឆ្នាំ២០២១នេះ។ 

ដោយឡែកបុគ្គលិក-កម្មករ ដែលកំពុងបម្រើការងារដឹកជញ្ជូនទំនិញ ម្ហូបអាហារ និងអ្នកប្រកបមុខរបរសេដ្ឋកិច្ចក្រៅប្រព័ន្ធទាំងអស់ ដែលមានបំណងចង់ទទួលបាននូវវ៉ាក់សាំងបង្ការជំងឺកូវីដ-១៩ ដូសទី៣ ឬដូសជំរុញ សូមរួសរាន់មកកាន់ទីកន្លែងដែលមានកំណត់ និងរៀបចំដោយរដ្ឋបាលរាជធានីភ្នំពេញ ទាំង៤២ទីតាំង ទូទាំងខណ្ឌទាំង ១៤ ក្នុងរាជធានីភ្នំពេញ។ 

ដើម្បីទទួលបានវ៉ាក់សាំងបង្ការជំងឺកូវីដ-១៩ ដូសជំរុញ ឬដូសទី៣ សូមប្រជាពលរដ្ឋគោលដៅ ជាពិសេសបុគ្គលិក-កម្មករ ដែលកំពុងបម្រើការងារដឹកជញ្ជូនទំនិញ ម្ហូបអាហារ និងអ្នកប្រកបមុខរបរសេដ្ឋកិច្ចក្រៅប្រព័ន្ធទាំងអស់ ភ្ជាប់មកជាមួយនូវឯកសារពាក់ព័ន្ធសំខាន់រួមមាន៖ ១. បណ្ណចាក់វ៉ាក់សាំងកូវីដ-១៩ ២. បណ្ណសម្គាល់ខ្លួនបុគ្គលិក-កម្មករ ឬលិខិតផ្សេងៗដែលបញ្ជាក់ការប្រកបមុខរបរសេដ្ឋកិច្ចក្រៅប្រព័ន្ធ ៣. អត្តសញ្ញាបណ្ណសញ្ជាតិខ្មែរ ឬឯកសារដែលបានប្រើប្រាស់ក្នុងការចាក់វ៉ាក់សាំងនាពេលកន្លងមក ៤. គោរពនូវលក្ខខណ្ឌគម្លាត ៤ខែ គិតចាប់ពីការទទួលបាននូវវ៉ាក់សាំងបង្ការកូវីដ-១៩ ដូសទី១។